Edhe pse frutat konsiderohen zakonisht si mënyra ideale për të nisur ditën, disa prej tyre mund të mos jenë zgjedhja më e mirë kur konsumohen në mëngjes, sidomos me stomakun bosh.
Profesori Tim Spector, epidemiolog dhe ekspert i të ushqyerit nga King’s College në Londër, shpjegon se disa fruta mund të shkaktojnë uri të shpejtë dhe lodhje vetëm një orë pas konsumimit.
Sipas tij, bananet dhe mangoja nuk janë ideale për vaktin e parë të ditës. Megjithëse janë të pasura me vitamina dhe minerale, ato kanë përmbajtje të lartë sheqeri dhe pak fibra.
Kur hahen bosh, sheqeri përthithet shpejt në gjak, duke dhënë energji të menjëhershme, por afatshkurtër. Më pas, nivelet e sheqerit bien, duke shkaktuar lodhje, nervozizëm dhe dëshirë për ushqime të shpejta.
Profesori Spector rekomandon frutat e pyllit, si boronicat, mjedrat, dredhëzat dhe manaferrat, të cilat kanë më pak sheqer dhe janë të pasura me fibra e polifenole – antioksidantë që ndihmojnë shëndetin e zorrëve dhe zgjatin ndjesinë e ngopjes.
Nëse nuk dëshironi të hiqni dorë nga bananet apo mangoja, ai sugjeron t’i shoqëroni me ushqime që përmbajnë proteina dhe yndyra, si kos grek i plotë ose një grusht arra dhe bajame, për të ngadalësuar përthithjen e sheqerit dhe për të mbajtur energjinë të qëndrueshme.
A është mëngjesi i domosdoshëm?
Profesori thekson se mëngjesi nuk është i detyrueshëm për të gjithë. Nëse nuk ndiheni të uritur menjëherë pas zgjimit, mund ta shmangni, sidomos nëse ndiqni agjërimin e ndërprerë, i cili për disa persona ka përfitime shëndetësore.
