Një burrë i vendosur duroi vite refuzimi përpara se e dashura e tij më në fund ta pranonte propozimin e tij për martesë. Pas shtatë vitesh dhe 42 refuzimeve, Sarah Wintrip, 38 vjeçe, i tha “po” partnerit të saj, Luke Wintrip, 36 vjeç, në përpjekjen e tij të 43-të. Luke kishte dashur të martohej me Sarah që nga viti 2018, por pavarësisht propozimeve të tij, ajo refuzoi 42 herë përpara se të pranonte. Çifti më në fund u martua dhe tronditi shumë njerëz me historinë e tyre të pazakontë të dashurisë.
Fillimisht, Sarah e refuzoi propozimin e Luke vetëm gjashtë muaj pas fillimit të lidhjes së tyre në vitin 2018, duke përmendur ndarjen e saj të fundit dhe hezitimin për t’u lidhur përsëri, veçanërisht duke pasur parasysh tre vajzat e saj. “Nuk e prisja. E doja, por nuk doja t’i thoja ‘po’. Doja të sigurohesha me fëmijët dhe gjithçka që po ndodhte se ishte e drejtë. Luke tha ‘në rregull, mirë, por do të vazhdoj të të pyes’”-tha Sarah. Për shtatë vjet, Luke i bëri asaj propozime madhështore, nga marrja me qira e një kështjelle në Pragë deri te darkat nën dritën e qirinjve dhe udhëtimet me kalë në një plazh xhamajkan.
Pas përpjekjes së tij të 42-të, Sarah e ngacmoi: “Herën tjetër, do të them po”. Luke priti një vit, pastaj e çoi në Greenwich, Londër Juglindore, një qendër për matjen e kohës dhe navigimin, shtëpia e Observatorit Mbretëror. Kur i propozoi, ai tha: “Kjo është qendra e botës dhe ti je qendra e botës sime dhe dua që të martohesh me mua.” “Më në fund ai fitoi zemrën time”-tregoi Sarah. “Mendoj se ndoshta duhet të fitojë një Rekord Botëror Guinness. Jam mirënjohëse që ai këmbënguli për kaq gjatë”, bëri shaka ajo.
