Presidenti francez, Emmanuel Macron dhe bashkëshortja Brigitte Macron kanë ngritur një padi për shpifje kundër influenceres së krahut të djathtë Candace Owens, e cila pretendon se zonja e parë e Francës ka lindur mashkull. Në padinë e bërë në shtetin amerikan Delaware, thuhet se “Owens ka përhapur trillime të çuditshme, shpifëse e të pabesueshme”.
Owens i ka përsëritur rregullisht këto pretendime në podcast-et e saj të njohura e në kanalet e mediave sociale. Në mars të vitit 2024 deklaroi se do të mbështetej në “tërë reputacionin e saj profesional”, në besimin e saj se znj.Macron “është në fakt një burrë”.
Një teori konspiracioni që ka qarkulluar për vite me radhë në hapësirat periferike online pretendon se znj.Macron ka lindur mashkull me emrin Jean-Michel Trogneux, emër me të cilin identifikohet vëllai i saj. Owens e ka përhapur teorinë e konspiracionit te audienca e saj e gjerë, përfshirë gati 7 milion ndjekës në X. Më herët këtë vit, publikoi një seri videosh të titulluar “Becoming Brigitte”.
Në një deklaratë të lëshuar nga avokatët, familja Macron tha se vazhdimisht i kanë kërkuar Owens-it tërheqje, por “përfundimisht arritën në përfundimin se “referimi i çështjes në një gjykatë ishte e vetmja rrugë e mbetur për zgjidhje”.
Owens shpërfilli të gjitha provat e besueshme që hedhin poshtë pretendimin e saj në favor të platformës së teoricienëve të njohur të konspiracionit dhe shpifësve të provuar.
Gjithashtu, Owens akuzohet për pretendime të rreme se presidenti francez dhe gruaja e tij janë të afërm gjaku e se Emmanuel Macron u vendos në detyrë nga një komplot sekret i CIA-s. Candace Owens punoi për organizata konservatore, përfshirë grupin studentor Turning Point dhe median Daily Wire, përpara se të lançonte podcast-in e saj të pavarur në vitin 2024.
Po ashtu ka punuar për një numër mediash dhe organizatash konservatore. Që atëherë ajo ka përhapur thashetheme ose ka sugjeruar se pas gjërave të tilla si vaksinat kundër COVID-it, Holokausti e uljet në Hënë, fshihen teori konspirative.
Padia përmend edhe kompanitë e saj me seli në Delaware e kërkon dëmshpërblim të paspecifikuar. Më parë, familja Macron ngriti padi ligjore kundër dy grave në Francë lidhur me teorinë e tyre se Brigitte Macron është një mashkull biologjik. Fillimisht, ato u shpallën fajtore për shpifje, por më pas, kjo u rrëzua, gjë që Brigitte e ka apeluar.
