Hotel” për bletët e vetmuara, jetime nga kosheret!

Në Itali po lind një projekt përrallor në fshatin Alghero, në Guardia Grande, rajon i Sardenjës. Vetëm pak metra larg një plazhi dhe një pylli me pisha, po i jepet jetë “Hoteleve të bletëve”, thënë ndryshe “strehimore për bletët e vetmuara dhe mbijetesën e tyre”, aq është thelbësore për pjalmimin.

Këto “shtëpi” të reja po marrin formë brenda kopshtit të bletëve, një “parajsë” e vogël e tyre, e krijuar duke rimarrë 5 hektarë tokë nga një ish-gurore. Këtu, pronari Davide Maffei ka mbjellë mijëra luledielli, livando, boronica, luleshtrydhe dhe rozmarinë duke krijuar një “mushkëri bletarie”, siç e quan ai, e para e strukturuar dhe e përhershme në vendin fqinj.

Një mbretëri biodiversiteti, një oaz i projektuar për insektet pjalmuese dhe që ushqehen me nektar. Por, kjo nuk është e gjitha.

Po ashtu, kopshti i bletëve është një park edukativ që mirëpret familjet dhe grupet shkollore për të përjetuar jetën e bletëve e florës, si dhe për të shpjeguar rëndësinë e këtij insekti, të kërcënuar nga ndryshimet klimatike e praktikat bujqësore njerëzore.

Për ta bërë këtë oaz edhe më unik e të dobishëm, kopshti i bletëve është mbështetur në bashkëpunimin e vlefshëm të rrjetit “Bug’s Hotel Ita”, i specializuar në krijimin e strehimoreve për insektet pjalmuese dhe Laboratorit Social të Trentos, një qendër e shkëlqyer në dizajnin e qëndrueshëm.

Ky bashkëpunim synon krijimin e një mundësie të re për bletët e vetmuara. Ndryshe nga bletët e mjaltit që jetojnë në koshere, bletët e vetmuara nuk prodhojnë mjaltë, por luajnë një rol vendimtar në ekosistem, duke kontribuar në pjalmimin e specieve të shumta bimore.

Megjithatë, këto bletë kërcënohen nga humbja e habitatit dhe përdorimi i pesticideve.

Jemi krenarë që fillojmë këtë nismë, e cila kombinon mbrojtjen e mjedisit, edukimin dhe inovacionin, shpjegoi Davide Maffei. Përafërsisht 75% e bimëve të planetit mbështeten në pjalmimin entomofil, domethënë, nga një gamë e gjerë insektesh.