Larja është një pjesë e rëndësishme e përditshmërisë sonë, por një pyetje që shpesh ngre diskutime është: sa shpesh duhet të lahemi në të vërtetë?
Ekspertët theksojnë se ndonëse larja është thelbësore për higjienën personale, frekuenca e saj duhet të përshtatet me nevojat individuale dhe jo të ekzagjerohet, pasi mund të dëmtojë lëkurën.
Faktorët që ndikojnë në frekuencën e larjes
Sipas dermatologëve, nuk ka një rregull universal që vlen për të gjithë, pasi disa faktorë personalë dhe mjedisorë luajnë rol kyç:
-Lloji i lëkurës: Lëkura e ndjeshme ose e thatë mund të dëmtohet nga larjet e shpeshta, ndërsa lëkura e yndyrshme ka nevojë për pastrim më të shpeshtë për të parandaluar bllokimin e poreve dhe shfaqjen e akneve.
-Aktiviteti fizik: Nëse ushtroheni rregullisht ose djersiteni shumë gjatë ditës, larja më e shpeshtë është e domosdoshme për të larguar papastërtitë, djersën dhe bakteret.
-Kushtet klimatike: Ata që jetojnë në zona me klimë të nxehtë e të lagësht mund të ndihen më të nevojitur të lahen shpesh për të mbajtur freskinë dhe higjienën.
-Shëndeti dhe rutina personale: Sëmundje të caktuara të lëkurës ose kushtet shëndetësore mund të kërkojnë kujdes të shtuar në larje, ndërsa persona të tjerë mund të lahen më rrallë pa probleme.
Sa herë në javë është ideale?
Studiuesit dhe dermatologët bien dakord se për shumicën e njerëzve, 3 deri në 4 larje në javë janë të mjaftueshme për të ruajtur pastërtinë dhe për të mos dëmtuar barrierën natyrale të lëkurës.
Larjet e përditshme mund të jenë të justifikuara në raste specifike, por të lahesh tepër shpesh mund të heqë yndyrën natyrale të lëkurës dhe të çojë në tharje, acarim ose ndjeshmëri të shtuar.
Në anën tjetër, larja shumë e rrallë mund të çojë në grumbullim të bakterieve dhe qelizave të vdekura, duke shkaktuar aromë të keqe, akne apo infeksione të mundshme të lëkurës.
