Në veri të Italisë, në zemër të Alpeve, fermerët vendas kanë vendosur barriera me pagesë në disa prej vendeve më të fotografuara në rrjetet sociale, për të ndalur turmat e turistëve që shkelin pronat e tyre.
Vizitorët që duan të hyjnë në zona si Seceda dhe Tre Majat (Drei Zinnen) tani duhet të paguajnë 5 euro për të kaluar në këto vende “instagrammable”. Arsyeja? Shumë turistë futen pa leje, lënë mbeturina dhe kalojnë nëpër livadhe private vetëm për një foto të bukur.
“Kalojnë qindra njerëz çdo ditë nëpër tokat tona, hedhin mbeturina dhe nuk respektojnë asgjë. Vendosëm pagesë për të bërë një deklaratë,” tha Georg Rabanser, pronar toke dhe ish-sportist në ekipin kombëtar.
Influencer-ët në shënjestër
Carlo Zanella, presidenti i Klubit Alpin Alto Adige, mbështet fermerët. Ai shprehet i revoltuar me turizmin e tepruar dhe do që qeveria të ndërhyjë.
“Do e rrisja pagesën nga 5 në 100 euro. Madje do mbyllja edhe llogaritë e influencer-ëve,” thotë ai.
Sipas Zanella-s, turistët e dikurshëm vinin të përgatitur për ecje, me veshje të duhura dhe harta. Sot, shumë vijnë me shapka dhe çadra plazhi, ngjiten në mal me teleferik dhe mbeten lart sepse nuk dinë as orarin e kthimit.
Ligji, reagimet dhe masa të tjera në Itali
Sipas ligjit italian, hyrja në parqet natyrore si Dolomitet duhet të jetë e lirë. Por deri tani, autoritetet nuk kanë ndërhyrë për të hequr pagesat që kanë vendosur fermerët. Në zonën Santa Cristina janë punësuar roje për të mbajtur turistët në shtigje dhe për të parandaluar përdorimin e dronëve.
Ndërkohë, në pjesë të tjera të Italisë po vendosen masa kufizuese ndaj turizmit masiv: Në Aosta, vizitorët nuk mund të shkojnë me makinë në mal, duhet të përdorin autobus me pagesë.
Në liqenin Braies, hyrja kushton 40 euro për makinë. Në Sardenjë, ndalohet të hapësh gropa për çadrat, të tymosësh, ose të shtrihesh pa tapet në rërë. Në Elba dhe Diano Marina ndalohet ecja me rroba banje jashtë plazhit, gjoba deri në 500 euro. Në shumë zona, ndalohet muzika e lartë dhe alkooli për konsum në rrugë.
