Kompania gjermane Mercedes-Benz ka njoftuar tërheqjen nga tregu të rreth 223,000 furgonëve në mbarë botën, për shkak të një defekti të mundshëm në sistemin e airbag-ut të shoferit.
Lajmi u bë i ditur nga Autoriteti Federal i Transportit në Gjermani (KBA), përmes një njoftimi zyrtar.
Tërheqja përfshin modelet Viano dhe Vito, të prodhuara në periudhën dhjetor 2002 deri shkurt 2006.
Vetëm në Gjermani pritet që rreth 60,000 automjete të jenë të prekura nga ky defekt.
Sipas një zëdhënëseje të Mercedes-Benz, problemi lidhet me faktin se disa prej këtyre automjeteve janë pajisur me module airbag-u nga prodhuesi Takata, gjatë ndërrimeve të mëparshme. Takata është i njohur për një sërë defektesh globale që lidhen me airbag-ët e tij.
Rreziku qëndron në mundësinë që, në rast aksidenti, gjeneratori i gazit i airbag-ut të shpërthejë në mënyrë të parregullt, duke dërguar copëza metalike në kabinë, çka mund të shkaktojë lëndime serioze për shoferin dhe pasagjerët.
Mercedes-Benz ka bërë të ditur se pronarët e mjeteve do të njoftohen me shkrim nga rrjeti i shitësve zyrtarë.
Kontrolli dhe, nëse është e nevojshme, zëvendësimi i airbag-ut do të kryhet pa asnjë kosto për klientin.
