Dr. Elizabeth Hawkes, kirurge okuloplastike dhe eksperte e njohur e bukurisë në Mbretërinë e Bashkuar, ka ndarë një paralajmërim të rëndësishëm për të gjitha gratë që përdorin grim: kujdesi gjatë heqjes së tij është po aq i rëndësishëm sa dhe aplikimi i tij.
Sipas saj, zona poshtë syve është shumë më e ndjeshme dhe delikate se pjesa tjetër e fytyrës, ndaj kërkon një trajtim të veçantë. Lëkura poshtë syve është dukshëm më e hollë, dhe mund të dëmtohet lehtësisht nga fërkimi ose presioni i tepërt
-shpjegon Hawkes.
Ajo thekson se një nga gabimet më të zakonshme që bëjnë shumë gra është fërkimi i fortë i syve për të hequr grimin.
Ky veprim, në vend që të ndihmojë, mund të shkaktojë irritim, rrudha të parakohshme dhe dëmtim të shtresave të brendshme të lëkurës.
Si të veproni saktë?
Ekspertja rekomandon një metodë më të butë dhe efektive: thjesht vendosni një tampon pambuku të lagur me produktin e duhur për heqjen e grimit mbi sytë, pa ushtruar presion.
Për qepallat e sipërme, mbyllni sytë dhe shtypni lehtë me pambuk, pastaj fshijeni butësisht. Ndoshta do t’ju duhet ta përsërisni këtë proces disa herë, por është më mirë sesa të dëmtoni lëkurën
-thotë Hawkes.
Ajo shton se arsyeja pse kjo zonë është veçanërisht e ndjeshme lidhet me muskujt aktivë që ndodhen poshtë syve.
Ky muskul kontraktohet mesatarisht 15 mijë herë në ditë përmes të rrahurave të qepallave dhe shprehjeve të fytyrës. Kjo lëkurë është nën stres të vazhdueshëm, prandaj duhet të jetë prioritet në kujdesin tuaj të përditshëm për fytyrën
-thekson mjekja.
Ky paralajmërim vjen në një kohë kur gjithnjë e më shumë gra janë të vetëdijshme për rëndësinë e kujdesit ndaj lëkurës, dhe fton për më shumë kujdes gjatë hapave të pastrimit të përditshëm të grimit.
