Ajo që duhej të ishte një ditëlindje e qetë dhe private për Thomas Markle, është kthyer sërish në objekt diskutimesh publike, teksa zbulime të reja kanë risjellë në vëmendje rolin e tij në kaosin që parapriu dasmën mbretërore të Meghan Markle dhe Princit Harry, në vitin 2018.
Në librin autobiografik të Princit Harry, “Spare”, babai i dukeshës përshkruhet si një nga figurat kryesore që shkaktuan trazira vetëm pak ditë para ceremonisë, duke orkestruar një skandal mediatik që e la Meghan të shkatërruar emocionalisht dhe e shqetësoi thellësisht Familjen Mbretërore.
Ndërkohë që nëna e Meghan, Doria Ragland, u tregua diskrete dhe larg vëmendjes, Thomas Markle mori një rrugë të kundërt.
Sipas kujtimeve të Harry-t, ai bashkëpunoi me paparacët për të inskenuar foto të planifikuara, në kohën kur i kërkonte vajzës së tij privatësi dhe qetësi.
Ai u betua se nuk kishte sajuar kurrë ndonjë foto
-shkruan Harry në libër, duke kujtuar momentin kur Meghan, fillimisht, besoi fjalën e të atit. Por mëngjesin pasues, e vërteta doli në dritë dhe Thomas i shkroi vajzës dhe dhëndrit një mesazh të shkurtër:
Jam shumë i turpëruar.
Pas kësaj, situata mori përmasa dramatike. Veç poshtërimit publik, Thomas Markle pësoi edhe një atak në zemër, gjë që e pengoi ta shoqëronte Meghan drejt altarit – një moment që u përjetua me dhembje nga e bija.
Për Meghan, e gjithë kjo solli pasoja të mëdha emocionale. Ndërsa familja e saj biologjike ishte në qendër të zhurmës mediatike, mbështetja më e madhe i erdhi nga familja që po krijonte në pallatin mbretëror.
Pavarësisht viteve që kanë kaluar, kjo histori vazhdon të lërë një njollë të errët në marrëdhëniet familjare të Dukeshës së Sussex, duke u rikthyer në vëmendje sa herë që përmendet figura e babait të saj.
