Në një marrëdhënie, jo çdo gjë që ndodh shpesh është domosdoshmërisht e shëndetshme. Ekspertët e marrëdhënieve theksojnë se ka disa sjellje që mund të duken “të zakonshme”, por në fakt janë sinjale të hershme të një lidhjeje toksike. Këto sjellje, edhe pse të vogla në pamje të parë, mund të kenë pasoja të mëdha në afatgjatë.
Fajësimi i vazhdueshëm
Nëse partneri të bën gjithmonë të ndihesh fajtor, edhe për gjëra që nuk varen nga ty, kjo nuk është kompromis, por një formë manipulimi emocional.
Kontrolli mbi privatësinë
Të kontrollojë telefonin, mesazhet apo aktivitetin në rrjete sociale nuk është shenjë afeksioni, por mungesë besimi dhe pasiguri. Çdo njeri ka të drejtë për hapësirën e tij personale.
Talljet apo ulja në publik
Kur “humori” i partnerit bëhet shkak që ti të ndihesh keq apo i/e poshtëruar përballë të tjerëve, kjo nuk është lojë, por mungesë respekti.
Ndëshkimi me heshtje
Të mos flasë për orë apo ditë me radhë si formë ndëshkimi është një mënyrë jo e shëndetshme për të menaxhuar konfliktet dhe një formë e kontrollit emocional.
Të jetosh në ankth për të mos e mërzitur
Nëse ndihesh gjithmonë i tensionuar dhe me frikë për të mos “prishur” humorin e partnerit, kjo tregon një mungesë sigurie dhe një klimë emocionale jo të qëndrueshme.
Marrëdhënia duhet të jetë një vend sigurie, mirëkuptimi dhe mbështetjeje. Nëse ndonjë nga këto sjellje është pjesë e lidhjes tënde, ndoshta është koha të reflektosh dhe të vlerësosh nëse kjo marrëdhënie i sjell paqe apo dëm jetës tënde.
