Këngëtarja me origjinë shqiptare, Rita Ora, ka ndarë një rrëfim prekës për një periudhë të vështirë të jetës së saj, kur pasiguritë për pamjen fizike ndikuan thellë në shëndetin mendor dhe vetëvlerësimin e saj.
E ftuar në podcast-in “Happy Place”, artistja britanike tregoi se në fund të të njëzetave e ndjente se nuk përmbushte pritshmëritë e shoqërisë për një “trup perfekt”, çka e çoi drejt një rënieje emocionale.
Fillova të sëmuresha shpesh, nuk kisha energji dhe nuk ndihesha mirë me veten. Nuk kujdesesha për trupin tim. Dhe pastaj erdhi mendimi: ‘Nuk jam aq e dobët sa të tjerët – prandaj jam e shëmtuar’. Sot më duket tronditëse që e besoja këtë
-u shpreh Rita me sinqeritet.
Në kuadër të bashkëpunimit të saj me markën Dove dhe iniciativën “Self Esteem Project”, ajo theksoi rëndësinë e pranimit dhe dashurisë për veten:
Është si të takosh atë vajzën e vogël që ishe dikur dhe t’i thuash: ‘Ti je shumë më e bukur se ç’mendon’. Të gjithë meritojmë ta ndiejmë këtë.
Rita Ora vazhdon të përdorë zërin e saj për të promovuar vetëpranimin dhe për të sfiduar standardet toksike të bukurisë që shpesh ushtrojnë presion të panevojshëm, sidomos mbi të rinjtë.
