Netflix ka tejkaluar pritshmëritë e analistëve për fitimet në tremujorin e dytë të vitit 2025, kryesisht falë publikimit të sezonit të tretë të serialit super të ndjekur “Squid Game”. Kompania ka rritur gjithashtu pritshmëritë për të ardhurat vjetore, duke reflektuar një rritje të shëndetshme të anëtarësimeve dhe të të ardhurave nga reklamat.
Për periudhën prill-qershor, Netflix raportoi një fitim për aksion prej 7.19 dollarësh, mbi pritshmërinë e analistëve që ishte 7.08 dollarë.
Fitimi neto arriti në 3.1 miliardë dollarë, ndërsa të ardhurat totale prekën 11.08 miliardë dollarë, duke kaluar projeksionet e tregut.
Edhe pse aksionet e kompanisë pësuan një rënie të lehtë prej 1% pas mbylljes së tregut, Netflix mbetet në një trajektore pozitive, me një rritje prej afro 44% të vlerës së aksioneve gjatë këtij viti.
Seriali “Squid Game”, që është shfaqja më e ndjekur jo-anglisht në historinë e platformës, mblodhi 122 milionë shikime vetëm disa ditë pas publikimit të sezonit të tij të fundit.
Bashkë me të, gjatë tremujorit janë lansuar edhe tituj si “Sirens”, “The Four Seasons” dhe sezoni i tretë i “Ginny & Georgia”.
Në përpjekje për të diversifikuar përmbajtjen dhe për të tërhequr një audiencë më të gjerë, Netflix ka shtuar edhe ngjarje live, si transmetimet e ndeshjeve të mundjes WWE, dhe ka ndërtuar një version të platformës me mbështetje reklamuese për përdoruesit që janë më të ndjeshëm ndaj çmimit.
Kompania ka ndaluar publikimin e të dhënave tremujore për numrin e abonentëve, duke i kërkuar investitorëve të fokusohen te fitimi si tregues kryesor i suksesit.
Për tremujorin e ardhshëm, Netflix parashikon të ardhura prej 11.5 miliardë dollarësh dhe fitim neto prej 3 miliardë dollarësh, duke e mbajtur veten mbi pritshmëritë e analistëve.
Ndërkohë, pritet me interes rikthimi i dy prej serialeve më të suksesshëm të platformës: “Wednesday” në gusht dhe episodet përmbyllëse të “Stranger Things” në nëntor dhe dhjetor.
