Pasditen e 17 korrikut, në rrugën “Lumni Surdulli” në Vushtrri ka ndodhur një incident i armatosur, ku një qytetar është kërcënuar me armë zjarri nga një person tjetër.
Sipas burimeve të Gazetës Sinjali brenda Policisë, viktima, R.S., rreth 44 vjeç, ka deklaruar se, ndërsa ishte duke udhëtuar me veturë, një automjet tjetër e kishte ndaluar në mënyrë të papritur. Nga ajo veturë, një person i ishte afruar, i kishte hapur dritaren dhe e kishte kërcënuar verbalisht, duke i drejtuar një armë zjarri.
Policia ka ndërhyrë me shpejtësi dhe ka arrestuar të dyshuarin, i identifikuar si Hilmi Sadiku, rreth 55 vjeç. Gjatë kontrollit të veturës së tij, në një sirtar është gjetur një armë zjarri e tipit Heckler – 9 mm, një karikator dhe nëntë fishekë. Këto janë sekuestruar si prova materiale.
Me urdhër të Prokurorit të Shtetit, është kryer edhe një kontroll në banesën e të dyshuarit, ku janë gjetur dhe sekuestruar dy karikatorë dhe gjashtë fishekë të tjerë.
I dyshuari është ndaluar për 48 orë, ndërsa ndaj tij është iniciuar procedurë penale për veprat “Kanosje” dhe “Mbajtje në pronësi, kontroll ose posedim të paautorizuar të armëve”. Hetimet rreth rastit janë në vazhdim.
