Ariana Grande i është përgjigjur zërave se po planifikon të largohet nga muzika, duke e bërë të qartë se kënga dhe muzika mbeten pjesë e pandashme e jetës së saj.
Fituesja e çmimit Grammy reagoi përmes një postimi në Instagram, duke ndarë një video të vetes duke performuar në Met Gala 2024. Krahas klipit, ajo shkruan:
Shumë e çuditshme nga ana juaj të mendoni se, vetëm sepse kam duart plot me projekte të ndryshme, do të braktis këngën dhe muzikën…!!! Ajo ka qenë dhe do të jetë gjithmonë shpëtimi im. Duhet të ketë vend për të gjitha.
Grande, e cila kohët e fundit është angazhuar si aktore në filmin e shumëpritur “Wicked” dhe publikoi albumin “Eternal Sunshine” vitin e kaluar, sqaroi se edhe pse karriera e saj mund të mos duket si më parë, ajo po e shijon më shumë se kurrë:
Ndoshta nuk do të duket si më parë, por unë e preferoj shumë më tepër mënyrën si e shoh tani në mendjen time. Po e shijoj. Ndihem mirënjohëse, e emocionuar dhe e frymëzuar.
Në fund të mesazhit të saj, Ariana dha një lajm të mirë për fansat:
Po punoj për një plan që të këndoj për ju vitin tjetër. Edhe nëse është vetëm pak. Ju dua.
Kështu, fansat mund të marrin frymë lirisht – Ariana Grande nuk ka ndërmend të largohet nga muzika. Ajo thjesht po kërkon balancën e duhur mes projekteve të shumta dhe pasioneve që e frymëzojnë.
