Sofia Vergara festoi së fundmi ditëlindjen e saj të 53-të, por surpriza më e madhe erdhi nga qyteti i saj i lindjes, Barranquilla, Kolumbi, ku u përurua një statujë gjigante prej 7.5 metrash në nder të aktores. Megjithatë, ajo që supozohej të ishte një homazh për yllin e Hollywood-it, u prit me kritika të ashpra online, pasi fansat pretendojnë se figura nuk i ngjan aspak Sofias.
Monumenti, që peshon 5.5 ton dhe është vendosur në një shëtitore buzë lumit në Barranquilla, u zbulua më 1 korrik, në ditëlindjen e Vergarës.
Autori i statujës është skulptori i njohur Yino Marquez, i cili punoi për shtatë muaj në krijimin e saj, së bashku me gjashtë studentë dhe të diplomuar të një shkolle arti lokale.
Por përkundër përpjekjeve artistike, reagimet e publikut nuk ishin aspak pozitive. Në rrjetet sociale, shumë komentues thanë se skulptura i ngjan më shumë Jessica Rabbit sesa vetë Sofia Vergarës.
Nuk e njoh dot nga fytyra… Dështim i madh, çfarë humbje parash… Ai që e ka bërë duhet të ketë qenë në të njëjtën shkollë arti me atë që bëri statujën e Ronaldos
-ishin disa nga komentet ironike që pushtuan rrjetin.
Përkundër kritikave, ceremonia u zhvillua me pjesëmarrjen e kryetarit të bashkisë, Alejandro Char, dhe përfaqësonte një përpjekje për të nderuar kontributin e Vergarës në art dhe për ta përkujtuar atë si një nga figurat më të njohura që ka dalë nga Barranquilla.
Kujtojmë se Yino Marquez është edhe autori i statujës së Shakirës, e cila u përurua në të njëjtin qytet në dhjetor të vitit 2023 — dhe ajo u prit shumë më mirë nga publiku.
