Këngëtarja britanike me prejardhje shqiptare, Rita Ora, ka tërhequr sërish vëmendjen në rrugët e New Yorkut, këtë herë me një paraqitje që ndërthur elegancën klasike me stilin urban bashkëkohor.
E veshur me një xhaketë gri me kuadrata dhe një minifund me pala që kujton uniformat shkollore, Rita i ka dhënë këtij kombinimi një kthesë moderne përmes zgjedhjes së aksesorëve.
Ajo ka zgjedhur këpucët loafer prej lëkure të zezë, një trend i fortë i këtij sezoni, të cilat i ka kombinuar me çorape të verdha të trasha nga Polo Ralph Lauren.
Ky kontrast i ngjyrave dhe teksturave i ka dhënë pamjes një frymë loje dhe guximi.
Loafers-ët, që këtë vit janë rikthyer fuqishëm në modë si për femra ashtu edhe për meshkuj, janë bërë zgjedhje e preferuar në pasarelat më të njohura dhe në stilin e rrugës.
Rita Ora i ka veshur gjatë disa daljeve të fundit publike, duke alternuar mes stileve të ndryshme – nga sandalet me takë transparente e deri te çizmet me taban të trashë.
Në paraqitjen e saj më të fundit, këngëtarja ishte veshur gjithashtu me një bluzë të bardhë me tekst artistik, ndërsa kishte kompletuar stilin me syze të mëdha katrore dhe vëthë rrethorë. Por vëmendja kryesore mbeti te këmbët: loafers-ët klasikë të kombinuar me çorapet ngjyrë të verdhë të ndezur.
Rita, e cila ndodhet në SHBA për të promovuar këngën e saj të re “Heat”, ka treguar edhe një herë se është një ikonë e stilit që nuk ka frikë të eksperimentojë. Përmes këtij kombinimi të veçantë, ajo sjell në skenë një modë që është njëkohësisht nostalgjike, rinore dhe plot personalitet.
