Owen Cooper, ylli 15-vjeçar i serialit “Adolescence”, pritet të shkruajë histori në botën e televizionit, teksa është një nga favoritët për t’u nominuar për çmimin prestigjioz Emmy.
Aktori i ri nga Warrington ka bërë debutimin e tij me rolin e Jamie Miller, një adoleshent i dyshuar për vrasje në një nga serialet më të ndjekur të Netflix. Performanca e tij ka marrë vlerësime të larta nga kritika, duke u cilësuar si e jashtëzakonshme për moshën e tij të re.
Nëse emërohet dhe fiton, Cooper do të bëhej mashkulli më i ri që ka fituar ndonjëherë një Emmy, duke thyer rekordin e Scott Jacoby, i cili në vitin 1973 fitoi çmimin si aktori më i mirë dytësor në moshën 16-vjeçare për rolin në “That Certain Summer”.
Momentalisht, rekordin për fituesen më të re e mban Roxana Zal, e cila në vitin 1984 fitoi një Emmy në moshën 14-vjeçare për filmin televiziv “Something About Amelia”.
Strategjia për të garuar në kategorinë “Aktori më i mirë dytësor” dhe jo në atë kryesore shihet si një lëvizje e zgjuar nga ekipi i Cooper, duke i dhënë më shumë gjasa për të triumfuar në një garë të fortë.
Emrat e nominuar do të shpallen këtë të martë, dhe të gjitha sytë janë të kthyer nga Cooper – talenti britanik që mund të hyjë në histori si një nga fituesit më të rinj të Emmy Awards, duke treguar se mosha nuk është pengesë për madhështinë në ekran.
