Jessica Alba është parë së fundmi në një fluturim nga Cancún drejt Los Angeles në shoqërinë e një burri misterioz – dhe tashmë mediat kanë zbuluar për kë bëhet fjalë.
Sipas TMZ, aktorja amerikane po shoqërohej nga aktori Danny Ramirez, i njohur për rolet e tij në “Captain America: Brave New World”, “Top Gun: Maverick” dhe “The Last of Us”.
Zërat për një lidhje mes dyshes nisën që në muajin maj, kur u fotografuan duke ecur bashkë në Londër. Megjithatë, vetëm tani është konfirmuar identiteti i tij.
Ky takim vjen vetëm disa muaj pas divorcit të Alba nga bashkëshorti i saj prej 17 vitesh, Cash Warren.
Në shkurt, ajo njoftoi publikisht ndarjen, duke theksuar se përkundër divorcit, mbeten një familje dhe se fëmijët e tyre janë përparësia kryesore.
Jessica dhe Cash kanë tre fëmijë: dy vajza, Honor dhe Haven, dhe një djalë, Hayes. Aktorja ka folur më parë për vështirësitë në martesën e tyre, duke pranuar se marrëdhënia e tyre ishte më shumë si mes shokësh dhome sesa si çift i martuar.
Pas ndarjes, ata kanë ruajtur një raport të qëndrueshëm dhe kanë kërkuar kujdestari të përbashkët për fëmijët.
Ndërkohë, takimet publike me Danny Ramirez po ndezin thashethemet se Alba mund të jetë duke e nisur një kapitull të ri në jetën e saj personale.
