Në vend që të ndjekin dietat strikte, gjithnjë e më shumë njerëz po i drejtohen një qasjeje të re, ushqyerjes intuitive, një praktikë që e inkurajon individin të dëgjojë sinjalet e trupit të vet për urinë dhe ngopjen, në vend që të ndjekë rregulla të jashtme. Kjo filozofi është më shumë se thjesht mënyrë të ushqyeri, është një rikthim tek besimi ndaj trupit dhe vetvetes.
Koncepti nuk është i ri, u prezantua për herë të parë në vitet ‘90 nga dy dietologe amerikane, por në vitin 2025 është rikthyer fuqishëm si përgjigje ndaj lodhjes kolektive nga dietat e rrepta, detoksët e momentit dhe presioni për të pasur një trup “ideal”. Në vend të kësaj, ushqyerja intuitive promovon një marrëdhënie të shëndetshme me ushqimin, ku asgjë nuk është e ndaluar, dhe çdo zgjedhje bëhet me vetëdije, jo me ndëshkim.
Një studim i publikuar këtë muaj në Journal of Health Psychology tregoi se:
Njerëzit që ndjekin ushqyerjen intuitive raportojnë më pak stres rreth ushqimit, më pak raste të të ngrënit emocional dhe një vetëvlerësim më të lartë, krahasuar me ata që janë në dieta të përhershme.
Në rrjetet sociale, kjo praktikë është bërë gjithashtu një pjesë e rëndësishme e bisedave për mirëqenie dhe vetëpranim. Hashtag si #FoodFreedom dhe #IntuitiveEating janë plot me histori të njerëzve që më në fund ndihen të lirë nga cikli i pafund i humbjes e shtimit të peshës.
Ushqyerja intuitive nuk është një justifikim për të ngrënë gjithçka në mënyrë të pakontrolluar, përkundrazi, është një proces që kërkon vetëdije, edukim mbi ushqimin dhe shumë durim. Por ajo çfarë ofron është e pazëvendësueshme: një marrëdhënie më paqësore me trupin, ushqimin dhe vetveten. Në një botë ku gjithçka është “më shumë”, më shpejt, më hollë, më perfekte, ndoshta çelësi është të mësojmë të dëgjojmë vërtet veten tonë.
