Nicole Kidman ka ndërtuar një karrierë mbresëlënëse, duke kaluar nga produksionet australiane në rolet kryesore të blockbuster-ëve hollivudianë. Edhe pse u bë e njohur falë filmit “Days of Thunder” (1990) me Tom Cruise, ajo fitoi zemrat e publikut sidomos me dramën independiente “To Die For”. Që prej atëherë, ka punuar me regjisorë si Gus Van Sant, Stanley Kubrick dhe Lars von Trier, duke afirmuar veten si një nga aktoret më të shquara të brezit të saj.
Në vitet e fundit, ajo ka qenë më pranë ekranit të vogël, dhe roli në dramën e HBO-së “Big Little Lies” i solli asaj Globin e Artë dhe lavdërime të shumta. Si Celeste, një grua që përjeton dhunë në familje, Kidman tregoi thellësi emocionale dhe brishtësinë e saj.
Pavarësisht se ka realizuar tashmë shumë role të shkëlqyera në televizion, ekziston një serial ku ajo dëshiron me ngulm të marrë pjesë – “The White Lotus”. “Unë jam një fanshe e madhe e Mike White-it, do të bëja gjithçka sepse mendoj që është fenomenal. E adhuroj ‘The White Lotus’,” deklaroi ajo për IndieWire, ndërsa kjo është transmetuar nga Far Out Magazine.
Edhe pse e njeh krijuesin e serialit, Mike White, që nga filmi “The Stepford Wives” (2004), Kidman ka zbuluar: “Më duket se nuk më kanë pyetur të luaj në serial.” Kjo deklaratë ka habitur të shumtë, duke pasur parasysh se sa natyrshëm do t’i përshtatej kastit.
Sezonet e deritanishme kanë sjellë personazhe të ndryshëm dhe një nivel të lartë produkcioni, dhe seriali ka fituar shumë Emmy dhe është bërë hit global.
Pasi që një sezon i ri pritet të dalë së shpejti, është e mundur që dëshira e aktorës për t’i bashkangjitur serialit të realizohet.
