Gjatë verës, instinktivisht kërkojmë pije të ftohta dhe akullore, por shkenca dhe përvoja tregojnë se jo gjithçka që është e ftohtë na freskon vërtet. Disa ushqime dhe pije, paradoksalisht, mund të na nxehin edhe më shumë. Më poshtë sjellim një përmbledhje të asaj që ndihmon realisht trupin të freskohet – dhe çfarë është vetëm iluzion freskie.
Miti: Sa më e ftohtë, aq më mirë
E vërteta është se një gllënjkë uji me akull sjell lehtësim të menjëhershëm, por efekti zgjat pak. Trupi reagon shpejt ndaj temperaturave të ulëta duke aktivizuar mekanizma ngrohjeje – përmes zgjerimit të enëve të gjakut dhe rritjes së qarkullimit. Me kalimin e kohës, konsumimi i tepërt i pijeve shumë të ftohta mund ta lodhë organizmin, sidomos sistemin tretës.
Pijet e ngrohta mund të freskojnë trupin
Duket e papërceptueshme, por nuk është. Në klimë të nxehta si India apo Lindja e Mesme, konsumimi i çajit të ngrohtë gjatë verës është një praktikë shekullore – dhe kjo ka një arsye. Pija e ngrohtë stimulon djersitjen, e cila është mekanizmi natyral i trupit për të ftohur veten. Kur djersa avullon nga lëkura, temperatura e trupit ulet. Sekreti qëndron në sasinë – një sasi e vogël e pijes së ngrohtë mund të jetë më efektive sesa një litër ujë i ftohtë.
Ushqimet që ngrohin, edhe pse nuk do ta prisnim
Ushqimet e yndyrshme dhe mishi i kuq kërkojnë më shumë energji për t’u tretur, dhe kështu trupi ngrohet nga brenda. Pijet e ftohta alkoolike krijojnë ndjesinë e freskisë, por alkooli zgjeron enët e gjakut dhe në fakt rrit ndjesinë e nxehtësisë. Po ashtu, pijet e gazuara shpesh përmbajnë sasi të lartë sheqeri që nxit aktivitetin metabolik, dhe për rrjedhojë edhe prodhimin e nxehtësisë.
Çfarë na freskon me të vërtetë?
Ushqimet që kanë shumë ujë, si pjepëri, kastravec, domate dhe selino, na freskojnë më së miri dhe na hidratojnë, po ashtu edhe çajrat bimorë në temperaturë ambienti. Për shembull, çaji i menteve ka një efekt natyral freskues.
Jogurti dhe kefiri, produktet e fermentuara të qumështit, gjithashtu na freskojnë, ndihmojnë tretjen dhe nuk e rëndojnë organizmin. Për fund, edhe pse mund të duket paradoksale, ushqimet djegëse në sasi të moderuara gjithashtu kanë efekt freskues. Kjo sepse specat djegës, si çili dhe paprika, përmbajnë kapsaicin, që nxit djersitjen dhe kështu ndihmon në ftohje.
