Me rritjen e vazhdueshme të kostos së jetesës, edhe romanca po bëhet më e kushtueshme. Nuk janë vetëm takimet e para që po preken nga inflacioni; edhe çiftet në lidhje afatgjata po kufizojnë daljet. Kostoja e një takimi ndryshon shumë nëpër Europë, duke pasqyruar nivelet e ndryshme të çmimeve në secilin vend. Ajo është rritur ndjeshëm në pesë vitet e fundit.
Po cilat janë qytetet më të shtrenjta dhe më të lira për një takim romantik?
Një studim nga Deutsche Bank Research, pjesë e raportit “Mapping the World’s Prices”, krahason koston e një takimi në 67 qytete në mbarë botën, nga të cilat pothuajse gjysma ndodhen në Europë. Për qëllimet e studimit, një “takim i lirë” përfshin: një shishe verë, një palë xhinse, një fustan, dy kafe, një vakt për dy persona në një restorant mesatar, dy bileta për kinema e dy bileta për transport urban.
Qytetet zvicerane dhe nordike më të shtrenjtat për takime
Këtë vit, Zvicra kryesoi listën si vendi më i shtrenjtë në Europë për një takim “të lirë”. Sa i përket qyteteve, Gjeneva kryeson me një kosto mesatare prej 400 €, e ndjekur nga afër nga Zyrihu me 393 €, duke zënë dy vendet e para në renditje.
Kopenhagen (337 €) dhe Oslo (321 €) ndjekin qytetet zvicerane në renditje.
Në Europë, Stokholmi renditet i shtati me 292 €, ndërsa Helsinki zë vendin e nëntë me 286 €, duke i pozicionuar kryeqytetet nordike së bashku me Zvicrën, si vendet më të shtrenjta për një takim në kontinent.
Britania kryeson sa i përket kostove të takimeve
Një takim “i lirë” kushton 313 € (269 £) në Londër dhe 297 € (255 £) në Edinburg, duke i pozicionuar dy qytetet britanike në vendin e 5-të e të 6-të në listë. Kjo gjithashtu e bën Mbretërinë e Bashkuar vendin më të shtrenjtë për takime në krahasim me katër ekonomitë më të mëdha të BE-së.
Në kryeqytetet e këtyre ekonomive, kostot janë dukshëm më të ulëta: 268 € në Paris, 248 € në Berlin, 224 € në Madrid dhe 200 € në Romë. Eshtë interesante se disa qytete jo-kryeqytete janë më të shtrenjta se kryeqytetet, të tilla si Milano (275 €), Mynih (272 €), Frankfurt (251 €), ndërsa Barcelona është një përjashtim i vogël me 214 €.
Kostoja mesatare e një takimi të lirë në 28 qytete europiane është 264 €.
Takime të lira: Stamboll, Pragë dhe Budapest
Stambolli renditet si qyteti më i lirë europian për takime, me 163 €, i ndjekur nga Praga (186 €) dhe Budapesti (192 €).
Megjithatë, këto shifra pasqyrojnë çmimet nominale dhe nuk marrin parasysh standardet e fuqisë blerëse (PPS). Për vendasit, këto kosto mund të duken ende të larta. Kur merren në konsideratë nivelet e të ardhurave, përballueshmëria ekonomike në të gjitha qytetet ka të ngjarë të ndryshojë ndjeshëm.
Qytete të tjera europiane me kosto relativisht të lira për një takim romantik përfshijnë Amsterdamin (290 €), Dublinin (283 €), Brukselin (275 €), Vjenën (253 €), Athinën (218 €) dhe Lisbonën (214 €).
Si krahasohen qytetet jo-europiane në kostot e takimeve?
Jashtë Europës, Nju Jorku renditet si qyteti më i shtrenjtë globalisht me 301 € (354 $), duke u renditur i 6-ti midis 67 qyteteve. Bangalore në Indi, është më i liri, me një takim që kushton vetëm 88 €.
Buenos Aires (252 €) është më i shtrenjtë se shumë qytete të mëdha europiane, si dhe destinacione të njohura globalisht si Los Angeles (244 €), Dubai (244 €) e Tokio (184 €). Nga ana tjetër, Shangai, Cape Town dhe Rio de Janeiro janë dukshëm më të lirë në terma nominalë, me koston e një takimi që bie nën 150 €.
Takimet janë bërë dukshëm më të shtrenjta
Në tetor 2022, inflacioni në BE arriti nivelin më të lartë në katër dekada, me koston e jetesës që u rrit ndjeshëm në pothuajse të gjitha shtetet anëtare. Kur krahasohet Indeksi i Takimeve të Lira nga 2020-a e deri në vitin 2025, është e dukshme një rritje e konsiderueshme.
Stambolli pa rritjen më të lartë, me koston e një takimi të lirë që u rrit me 84% në terma euro. Rritja është gjithashtu 40% ose më shumë në disa qytete të tjera: Edinburg (46%), Budapest (45%), Londër (41%) dhe Birmingham (40%).
Megjithatë, një pjesë e kësaj rritjeje ndikohet nga luhatjet e kursit të këmbimit. Në Mbretërinë e Bashkuar, për shembull, rritja aktuale do të ishte pak më e ulët kur llogaritet në monedhën vendase, rreth 33% në Londër.
Në Stamboll, ndikimi është edhe më dramatik: për shkak të zhvlerësimit të ndjeshëm të lirës turke në vitet e fundit, kostoja lokale e një takimi të lirë është rritur me mbi 840%.
Në shumicën e qyteteve europiane, kosto e një takimi të lirë është rritur me afërsisht 25-30% gjatë pesë viteve të fundit. Roma shquhet si qyteti i vetëm ku çmimet kanë rënë në terma euro me 2%.
