Nëse mendon se për të përjetuar diçka të re duhet patjetër një biletë avioni ose një fundjavë të shtrenjtë në një resort,mendoje sërish. Një trend i ri në rritje, sidomos pas pandemisë, është koncepti i aventurave të vogla si përvoja të shkurtra, lokale, spontane, por thellësisht transformuese. Kjo lëvizje nisi nga aventuristi britanik Alastair Humphreys, i cili promovoi idenë se nuk ke nevojë të shkosh larg për të ndjerë emocionin dhe rigjenerimin që të jep natyra apo zbulimi i diçkaje të re.
Çfarë përfshin një ‘micro-adventure’?
- Një ecje në një shteg të panjohur në periferi të qytetit
- Një piknik në një fushë apo kodër pas pune
- Një udhëtim i papritur me biçikletë pa destinacion
- Fjetje në tenda në një oborr të mikut
- Vizitë në një muze të harruar ose ekspozitë lokale
- Mjafton një ditë, pak dëshirë për spontanitet dhe shkëputje nga rutina për të pasur një përvojë që ndryshon këndvështrimin.
Pse funksionojnë më mirë se pushimet e gjata?
Sipas një studimi të publikuar në Journal of Positive Psychology, njerëzit që përfshiheshin në mikro-aventura të rregullta raportuan nivele më të larta të kënaqësisë ditore, energjisë dhe lidhjes me natyrën. Arsyeja? Ndryshe nga pushimet e mëdha që kërkojnë planifikim, para dhe kohë, këto përvoja janë të thjeshta, të arritshme dhe shpesh të papritura,çka e rrit ndikimin emocional dhe kujtimin pozitiv.
Si ta praktikosh?
- Zgjidh një ditë pa angazhime dhe vendos të bësh diçka ndryshe
- Mos e planifiko gjithçka në detaje, lejoi surprizat
- Merr me vete dikë që do, ose shko i vetëm për reflektim
- Mbaji si ritual: një herë në javë apo një herë në muaj
Në fund, aventurat e vogla janë një mënyrë për të rikthyer emocionin në jetën e përditshme, për të ushqyer shpirtin e eksplorimit dhe për të kuptuar se lumturia shpesh nuk ndodhet mijëra kilometra larg, por vetëm një hap jashtë rutinës.
