Zonja e Parë e Francës, Brigitte Macron, shoqëroi bashkëshortin e saj, Presidentin Emmanuel Macron, në vizitën zyrtare në Mbretërinë e Bashkuar, pavarësisht se po kalonte një moment të vështirë personal. Vetëm disa ditë para udhëtimit, Brigitte humbi motrën e saj të dashur, Anne-Marie Trogneux – një humbje që e ka prekur thellësisht.
Sipas burimeve të afërta me çiftin, kjo tragjedi shpjegon qëndrimin e saj të përmbajtur dhe sjelljen e ftohtë gjatë vizitës, që për disa vëzhgues u duk “e sikletshme” dhe “e distancuar”.
Kjo u vu re veçanërisht në momentin e zbritjes nga avioni, ku ajo dukej se injoroi dorën ndihmuese të Presidentit Macron, gjest që shkaktoi diskutime në rrjet.
Ajo e adhuronte motrën e saj dhe vdekja e saj e ka tronditur thellë
-tha një burim për “MailOnline”.
Megjithatë, Brigitte ndjeu se ishte detyrimi i saj si Zonja e Parë të qëndronte pranë bashkëshortit të saj dhe të përmbushte angazhimet institucionale.
Ky episod i dhimbshëm ndodhi vetëm disa muaj pasi një video e publikuar në media tregonte një moment tensioni mes çiftit në Vietnam, ku Brigitte shihej duke e shtyrë me shuplakë lehtë bashkëshortin e saj. Sqarimet zyrtare të asaj kohe e cilësuan ngjarjen si një “moment të parëndësishëm” mes një çifti bashkëshortësh.
Megjithë dhimbjen, Brigitte Macron tregoi përkushtim dhe përgjegjësi në detyrën publike, duke u bërë pjesë e një vizite me rëndësi diplomatike në një kohë shumë të vështirë për të.
