Një hulumtim i publikuar në revistën shkencore Stroke, ka zbuluar se personat që nuk mund të mbajnë ekuilibrin në një këmbë për më shumë se 20 sekonda kanë një rrezik dukshëm më të lartë për të pasur infarkte të heshtura cerebrale, gjakrrjedhje shumë të vogla në tru që zakonisht kalojnë pa simptoma të menjëhershme, por rrisin ndjeshëm rrezikun për sulm cerebral madhor dhe demencë në të ardhmen. Në këtë studim, individët me kohë më të shkurtër qëndrimi kishin një prevalencë më të lartë të dëmtimeve të vogla të enëve të gjakut në tru, të cilat mund të ndikojnë në funksionin njohës dhe koordinimin e lëvizjeve.
Në moshën 70-vjeçare, një person mesatarisht i shëndetshëm duhet të jetë në gjendje të qëndrojë rreth 20 sekonda në një këmbë. Në moshën 80-vjeçare, mesatarja zbret në rreth 9 sekonda. Personat 40–60 vjeç duhet të arrijnë të qëndrojnë të paktën një minutë, sipas profesorit të mjekësisë sportive John Brewer. Sipas tij, ky test nuk mat vetëm balancën, por është një tregues i forcës së muskujve, stabilitetit të kyçeve dhe shëndetit të ligamenteve që mbështesin gjunjët dhe nyjat. Për më tepër, qëndrueshmëria lidhet edhe me funksionin vestibular (ekuilibri), shëndetin e nervave dhe funksionin e përgjithshëm neuromuskular.
Balanca e dobët shpesh lidhet me rrezik më të lartë për rrëzime, fraktura dhe pasoja serioze, veçanërisht në moshë të shtyrë. Testi i qëndrimit në një këmbë përdoret si pjesë e vlerësimeve klinike të shëndetit të trurit, sidomos për të identifikuar rrezikun e goditjeve cerebrale “të heshtura”. Dëmtimet mikro-vaskulare cerebrale (që nuk japin simptoma menjëherë) mund të grumbullohen me kalimin e viteve dhe të ndikojnë në kujtesë, përqendrim dhe orientim hapësinor.
Nëse nuk mund të qëndroni aq sa rekomandohet për moshën tuaj, është një sinjal që duhet të forconi muskujt e këmbëve (stërvitje të lehta rezistence, ushtrime për gjunjët), koordinimin dhe balancën (ushtrime yoga, tai chi), forcën e bërthamës trupore (core strength), një trup i fortë në pjesën e barkut dhe shpinës ndihmon shumë në stabilitet, shëndetin kardiovaskular, aktiviteti fizik i rregullt dhe një dietë e pasur me antioksidantë dhe omega-3 ruajnë elasticitetin e enëve të gjakut. Nëse vëreni se keni humbje të balancës pa shkak, mpirje, marramendje të vazhdueshme apo çrregullime të shikimit, duhet të këshilloheni menjëherë me një mjek. Këto mund të jenë shenja të hershme të një çrregullimi neurologjik që kërkon trajtim të specializuar.
