Qoftë për kodin e tij të famshëm të veshjeve elegante, për sportivitetin, aftësisë dhe saktësisë, apo për ekuilibrin e tij të veçantë midis rivalitetit dhe hijeshisë, tenisi prej kohësh konsiderohet një nga sportet më me stil. “Tenisi përdor gjuhën e jetës,” ka thënë një herë Andre Agassi.
Avantazh, shërbim, gabim, pushim, dashuri, elementët bazë të tenisit janë ata të ekzistencës së përditshme, sepse çdo ndeshje është si një jetë në miniaturë.
Teksa lojtarët më të mirë në botë përballen në turnetë Grand Slam, duke treguar mjeshtëri dhe taktikë në fushat e Melburnit, Parisit, Londrës dhe Nju Jorkut, shpesh janë tifozët në tribuna ata që ofrojnë spektaklin e vërtetë, të paktën në aspektin e stilit. Nga pamja e egër e Justin Theroux te kostumi klasik i James Norton, ja çfarë mund të mësojmë nga shikuesit më elegantë të tenisit.
01. Klasikja nuk del kurrë nga moda
Me një kostum të qepur mjeshtërisht nuk gabon kurrë. Duke pasur parasysh kodin e veshjes, këshillohet të zgjedhësh ngjyra më të errëta ose, gjatë verës, blu të çelëta apo bezhë. Merr shembull nga James Norton dhe Rami Malek, suksesi i një veshjeje të përjetshme qëndron tek detajet e vogla që zgjedh për ta kompletuar. Një kravatë me ngjyrë apo me motive mund të jetë pika e fortë e pamjes, ndërsa një palë syze dielli të zgjedhura me kujdes do të të duhen patjetër gjatë seteve të gjata nën diell.
02. Zgjidh tonalitetin e duhur kur kombinon veshjet
Nëse ke siguruar bileta për Wimbledon dhe dëshiron të shmangësh një gabim stilistik, zgjedhja më e mirë është të kombinosh shtresa të veshjes me ngjyra të ngjashme, veçanërisht neutrale. Edhe pse nuk ka një kod të detyrueshëm veshjeje për Wimbledon, veshja elegante këshillohet fuqimisht, sidomos për ata që ulen në Centre Court ose në Court No. 1. Një përjashtim është Royal Box, ku kravata, xhaketa dhe këpucët elegante janë të panegociueshme. Në pjesët e tjera të tribunës, një pamje me tonalitete të lehta është mënyra më e thjeshtë për të treguar shkathtësinë tënde, pa u shqetësuar shumë për përputhjen e ngjyrave. Nëse zgjedh të veshësh këmishë mbi këmishë, si Andrew Garfield, sigurohu që jakat të jenë të përputhshme për një pamje më të rregullt. Për paletën e ngjyrave, zgjidh nuanca të ngjashme të së njëjtës ngjyrë dhe harmonizo edhe detajet e vogla për të kompletuar veshjen.
03. Sofistikimi i detajeve kur zgjedh veshjen
Veshja elegante nuk do të thotë domosdoshmërisht të veshësh një kostum klasik. Ndonjëherë, hijeshia e një veshjeje “të jetuar” mjafton për t’i dhënë pamjes dozën e duhur të finesës. Mjafton të marrësh shembull nga Justin Theroux, i njohur për stilin e tij “biker” dhe “western”, por në US Open vitin e kaluar ai solli një pamje klasike në fushë: një këmishë e bardhë e pastër, xhinse dhe syze aviator të përjetshme dhe sigurisht ishte i pagabueshëm.
04. Zgjidh një veshje që spikat
Gjithmonë duhet të jemi të kujdesshëm për të pasur një pamje të kuruar nga koka te këmbët. Por po aq shumë vlerësohet edhe një pjesë e vetme që e bën të gjithë kombinimin të duket i veçantë. Le të jemi realistë: nëse dëshiron të dallohesh nga turma në tribuna, ndoshta duhet të zgjedhësh një xhaketë, pasi do ta kalosh shumicën e kohës ulur, pantallonat nuk do të bien aq shumë në sy. Trego nivel me një xhaketë luksoze, merr frymëzim nga xhaketa prej lëkure struci në stil aviator e Pharrell Williams-it dhe për pjesën tjetër të veshjes ke liri të plotë.
05. Pse gjithmonë dominojnë veshjet me vija?!
Këmishat me vija janë një mënyrë e shkëlqyer për t’i dhënë personalitet veshjes tënde, pa e bërë atë të duket e ekzagjeruar. Prandaj ato konsiderohen një nga mënyrat më të lehta për të treguar që i ke kushtuar mendim asaj që ke veshur edhe nëse këmisha është thjesht hedhur mbi një bluzë të bardhë dhe pantallona prej lëkure, siç bën Timothée Chalamet. Në botën e vijave vertikale, ato që për mrekulli të bëjnë të dukesh pak më i gjatë, zgjidh vija të holla nëse do një pamje më formale që shkon me kostum, ose modele me vija më të trasha për t’i shtuar gjallëri një veshjeje të zakonshme.
