pple TV+ ka konfirmuar zyrtarisht zhvillimin e serialit të ri “I’m Glad My Mom Died”, bazuar në librin autobiografik bestseller të Jennette McCurdy. Rolin kryesor dhe njëherazi detyrën e producente ekzekutive do ta mbajë aktorja e njohur Jennifer Aniston.
Seriali me 10 episode, i cili do të realizohet nga Apple Studios, do të jetë një “dramedy” — një përzierje mes dramës dhe komedisë — dhe përfshin në skenar vetë McCurdy-n, në bashkëpunim me Ari Katcher.
Pjesëmarrja e Aniston ka ngritur pyetje në lidhje me të ardhmen e saj në serialin “The Morning Show”, ku ajo luan dhe prodhon. Megjithatë, raportimet thonë se roli i saj në “I’m Glad My Mom Died” nuk do të ndikojë në angazhimin për sezonin e katërt të “The Morning Show”, i cili do të shfaqet më 17 shtator, dhe as për një sezon të mundshëm të pestë.
Seriali rrëfen historinë personale të McCurdy-t, ish-yll i Nickelodeon-it, e cila përpiqet të përballet me kujtimet e dhimbshme të një marrëdhënieje toksike me nënën e saj narcisiste, të cilën do ta interpretojë Jennifer Aniston.
Projekti trajton tema të ndjeshme si dhuna emocionale, shëndeti mendor dhe presioni i famës në moshë të re.
Producentë të serialit janë edhe Sharon Horgan përmes kompanisë Merman (e njohur nga “Bad Sisters”), kompania LuckyChap e Margot Robbie, Jerrod Carmichael dhe Erica Kay.
Libri “I’m Glad My Mom Died” qëndroi për më shumë se 80 javë në listën e librave më të shitur të New York Times, dhe pritet që edhe adaptimi televiziv të krijojë jehonë të madhe në publik.
