Pitti Uomo është një nga eventet më të mëdha dhe më të rëndësishme në botën e modës për meshkuj. Organizuar dy herë në vit në Firence të Italisë, ai sjell së bashku markat më të njohura, dizajnerët, stilistët dhe blerësit nga e gjithë bota për të prezantuar trendet më të fundit dhe për të diskutuar për modën bashkëkohore të meshkujve. Pitti Uomo njihet për ekspozimin e stilit klasik dhe inovacionit në modën për meshkuj, duke përfshirë rrobaqepësinë, aksesorët dhe veshjet më të rafinuara dhe të stiluara me kujdes. Ai konsiderohet shpesh si “zemra rrahëse e modës për meshkuj” dhe ka ndikim të madh në tendencat globale të stilit meshkuj.
Pitti Uomo u rikthye sërish këtë sezon në Firence. Me të erdhi edhe si një kujtesë e mprehtë se rregullat e vjetra të veshjes klasike nuk po thyhen, por po rishkruhen. I njohur për rrënjët e tij të thella në traditën e rrobaqepësisë, eventi këtë vit pasqyroi një revolucion më të qetë. Jo një rebelim të zhurmshëm, por një nënvleftësim të butë, pothuajse poetik. Në vend që të shpiknin diçka krejt të re, pjesëmarrësit dhe stilistët ofruan interpretime të reja të të preferuarave të vjetra.
Këtë herë, Pitti Uomo nuk bërtiti për vëmendje, por të ftoi të shikoje më nga afër. Pas pamjes së bukur, çdo trend mbante nëntekstin e një bisede më të gjerë: për gjininë, formalitetin, vetë shprehjen dhe të ardhmen e traditës. Nuk ishin thjesht deklarata mode, por pyetje të thurura në pëlhurë. A është ende veshja formale një tregues hierarkie apo është kthyer në një formë autoportreti? Mund të ekzistojë eleganca pa ngurtësi? Dhe sa nga e ardhmja e modës qëndron tek e kaluara, por në kushtet tona tani? Teksa industria vijon të eksperimentojë me silueta, kode dhe identitete, një gjë është e qartë: burri modern nuk vishet më për t’u përshtatur, por për të eksploruar.
Këtu janë pesë trende kryesore që ofrojnë një pasqyrë se ku po shkon moda për meshkuj dhe çfarë përpiqet të tregojë në këtë rrugëtim.
01. Kostumet e verës tashmë një gjuhë e re fuqie
Dikur i rezervuar vetëm për bankierët dhe politikanët e qytetit, kostumi ka kaluar shumë evolucion. Por këtë sezon, ngjyra nuk ishte më thjesht një detaj, ishte personazhi kryesor. Qoftë blu pastel apo jeshile, lejla e lehtë apo korale, rrobaqepësia ka zyrtarizuar edhe ndarjen me ngjyrat gri. Struktura dhe prerja mbeten të njohura, por mesazhi tingëllon ndryshe. Kishte një ndjenjë vetë-shprehjeje të thurur në kostume. Në vend që të kërkonin autoritet, ato ofronin individualitet.
02. Kanotiere dhe bluzat zgjedhje që synojnë komfortin por edhe stilin unik
Dikur të kufizuara vetëm në palestër apo thjesht si të brendshme, kanotiert këtë herë qëndruan krenare si “partnere” dhe përshtatje elegante e kostumeve. Dhe kjo ka kuptim, duke pasur parasysh vapën. Duke zëvendësuar një këmishë tradicionale me diçka minimale dhe të çlodhur, si një kanotierë me vija ose një bluzë pambuku me jakë të rrumbullakët, pamja bëhet më pak për kontroll dhe më shumë për vetëbesim. Për më tepër, i shton edhe një element nostalgjie nga vitet ’90.
03. Sinjalet e fshehura të shallit të qafës
Ka diçka padiskutim që lidhet me kinematografinë nëse sheh një burrë që mban një shall të lidhur në qafë. Rikthimi i këtij aksesori të përjetshëm duket i qëllimshëm. Në Pitti, shamiat nuk ishin të ekzagjeruara. Përkundrazi, ishin të lidhura në mënyrë të shkujdesur rreth qafës, herë mezi të dukshme, herë me motive të pasura që e bënin një këmishë të bardhë të thjeshtë të duhej e mahnitshme. Në një klimë mode gjithnjë e më të fiksuar pas performancës, shalli i qafës duket se i reziston. Nuk ka ndonjë funksion praktik dhe ndoshta kjo është edhe e bukura. Lind pyetja: a mund të ekzistojë stili vetëm për hir të bukurisë?
04. Me çantat për meshkuj prakticiteti takon identitetin
Nëse ka një aksesor që përmbledh rolin që kanë aksesorët në modën e meshkujve, ajo është çantat për burra në çdo formë të mundshme. Çanta dore prej lëkure, ose çanta të mëdha prej kanavaci, çanta sportive të varura kryq, mini-valixhe, çanta tip “bucket”… Disa ishin të strukturuara dhe formale, të tjera të buta dhe praktike. Por pothuajse të gjitha nuk shërbenin vetëm për të mbajtur sende personale. Ato ishin shenja të shijes dhe funksionalitetit. Dhe në një mjedis ku kufijtë gjinorë po fshihen gjithnjë e më shumë, çanta për burra vazhdon të sfidojë konstruktet e vjetra.
05. Pantallonat e shkurtra po bëhen trend
Pantallona të shkurtra të qepura nuk janë një trend i ri, por këtë sezon në Pitti Uomo ato u paraqitën në një formë tjetër më të pjekur dhe të rafinuar. Të prerë me të njëjtin kujdes si pantallonat e palosura, me fund të përkulur këto pantallona u panë të kombinuara me këpucë lëkure, xhaketa madje edhe me kravatë. Kjo hap një diskutim më të gjerë rreth praktikës dhe elegancës. Në një botë pas pandemisë, ku rehatia është bërë një standard, ky trend duket si një pajtim mes stilit dhe komoditetit. Dëshira për të dukur i veshur mirë pa sakrifikuar shumë. Gjithashtu, është shenjë e një ndryshimi më të gjerë në modën për meshkuj, ku tradita nuk është më absolute, por e përshtatshme
