Ndërsa temperaturat e korrikut dhe gushtit në Mesdhe kapin vlerat mbi 40°C, shumë turistë po kthejnë vëmendjen nga veriu i Europës për të shmangur valët e të nxehtit dhe turmat e njerëzve. Me klimën e butë, natyrën e paprekur dhe qasjen e qetë ndaj pushimeve, Suedia po shfaqet si një alternativë tërheqëse ndaj destinacioneve klasike si Spanja apo Greqia.
Në arkipelagun e Goteborgut, pushuesit gjejnë ishuj të qetë si Vrångö e Valö, ku vera përfaqësohet nga thjeshtësia. Rrugicat e ngushta mes livadheve me lule të egra, plazhet me rërë të artë, molet prej druri që çojnë drejt ujërave të qeta dhe shtëpitë verore me ballkone prej dërrase, krijojnë një atmosferë ku heshtja dhe natyra janë në qendër. Jeta në këto ishuj është e ngadaltë dhe e përqendruar te përjetimi i momentit: një piknik në një gji shkëmbor, një shëtitje mes të bimësisë vendase apo një ditë me kayak rreth brigjeve.
Ndryshimet klimatike dhe moti gjithnjë e më i paparashikueshëm në vendet mesdhetare kanë sjellë rritje të ndjeshme të interesit për pushime në destinacione më të freskëta. Agjencitë turistike raportojnë rritje të fortë në kërkesat për udhëtime drejt Skandinavisë gjatë sezonit të pikut, ndërkohë që rezervimet për destinacionet tradicionale si Italia dhe Kroacia kanë rënë ndjeshëm. Të dhënat nga platformat Booking.com dhe Expedia konfirmojnë prirjen: kërkimet për Suedinë, Norvegjinë dhe Zvicrën janë rritur krahasuar me një vit më parë.
Temperaturat në Suedi gjatë verës qëndrojnë mesatarisht në 20-22°C, ideale për aktivitetet në natyrë. Mbrëmjet mund të jenë të freskëta, por kjo është koha ideale për të shijuar traditën suedeze të saunës. Në ishujt e arkipelagut, saunat e vogla lundruese, zhytjet në detin e ftohtë dhe banjat me ujë të ngrohtë jashtë, janë kthyer në pjesë thelbësore të përvojës turistike.
Kuzhina vendase pasqyron një angazhim për qëndrueshmëri dhe përdorimin e përbërësve lokalë. Përdorimi i algave dhe bimëve bregdetare, i drejtuar nga ekspertë të ushqimit të shëndetshëm, ofron një mënyrë të re për të kuptuar dhe shijuar natyrën. Gatimet përfshijnë sallata me alga, djathë haloumi të skuqur e bukë të pjekur në zjarr të hapur. Në restorantet buzë detit, darkat tradicionale me fruta deti, karkaleca të tymosur, molusqe me limon dhe kopër, shërbehen me shije e thjeshtësi.
Një përvojë autentike në Suedi nuk mund të jetë e plotë pa “fika”, një zakon kombëtar që përfaqëson pushimin e përditshëm për kafe dhe ëmbëlsira. Në qytetin Alingsås, i njohur si kryeqyteti i “fika”-s, guidat turistike lokale prezantojnë vizitorët me një larmi ëmbëlsirash tradicionale, nga biskotat me kanellë e kardamom te torta me vanilje dhe marzipan e njohur si Princesha.
Ndryshe nga perceptimi i zakonshëm që Skandinavia është destinacion dimri, Suedia po e ndryshon këtë ide. Me mbi 200 mijë ishuj, plazhe të qeta, ajër të pastër dhe ushqim të shkëlqyer, vendi ofron një alternativë të natyrshme, të qëndrueshme e tërheqëse për pushimet europiane.
