Demokracia Serbe ka njoftuar se më 28 qershor 2025, në telefonin mobil të nënkryetarit të partisë, Ivan Orloviq, është instaluar në mënyrë të paligjshme një softuer spiun, gjatë qëndrimit të tij në stacionin policor në Vushtrri, raporton KIM
Sipas deklaratës së tyre, softueri spiun është instaluar ndërkohë që Orloviq dhe katër anëtarë të tjerë të partisë ishin ndaluar pa qasje te avokati dhe pa mundësi për të njoftuar familjet.
Para marrjes në pyetje, policët i kërkuan Orloviqit të fikte telefonin dhe ta linte në një dollap. Softueri është instaluar në orën 22:12, ndërsa telefoni ishte i fikur dhe i kyçur. Marrja në pyetje zgjati deri në orën 23:00, dhe policia, sipas deklaratës, kishte qasje të pakufizuar në pajisje gjatë asaj kohe.
Nga kjo parti thanë se softueri spiun nuk ka qenë më parë në telefon. Pas ngjarjes, janë vërejtur ndryshime në renditjen e aplikacioneve në pajisje. Sipas ekspertëve, softueri maskohet si një aplikacion sistemor dhe në mënyrë të fshehtë mbledh të dhëna, biseda dhe mesazhe.
Telefoni do të dërgohet për ekzaminim shtesë tek organizata që merren me siguri digjitale. Demokracia Serbe u bën thirrje misioneve ndërkombëtare në Kosovë që të reagojnë dhe të sigurojnë mbrojtje për anëtarët e saj. Ata e konsiderojnë këtë akt si një sulm ndaj lirive politike dhe një përpjekje për frikësim.
Demokracia Serbe dyshon se ky softuer mund të përdoret për montim provash dhe diskreditim të zyrtarëve. Për incidentin fajësojnë pjesëtarët e policisë në Vushtrri. Ata theksojnë gjithashtu se “nuk do të heqin dorë nga veprimtaria e tyre politike, pavarësisht presioneve, kërcënimeve apo dhunës fizike.”
burimi i lajmit :
https://radiokim.net/vesti/saopstenja/242241-srpska-demokratija-tvrdi-da-je-potpredsedniku-instaliran-spijunski-softver/
