Festimet për martesën e Jeff Bezos dhe Lauren Sanchez kanë nisur tashmë dhe besohet se do të zgjasin pesë ditë. Megjithatë, përpara ceremonisë zyrtare, çifti është përballur me sfida, përfshirë protesta anti-Bezos në qytet, të cilat i kanë detyruar të ndryshojnë vendin e dasmës. Pavarësisht këtij ndryshimi, planet vazhdojnë pa ndalesë dhe shumë të famshëm nga mbarë bota kanë mbërritur në Evropë për të marrë pjesë. Ndër ta janë Kim Kardashian, Orlando Bloom, Tom Brady dhe Leonardo DiCaprio, të cilët janë parë në Venecia gjatë ditëve të fundit.
Një emër i njohur që nuk do të marrë pjesë është ish-presidenti Donald Trump. Sipas burimeve, ai ishte i ftuar në ceremoninë luksoze, por ka refuzuar ftesën për shkak të angazhimeve në agjendën e tij. Megjithatë, familja e tij do të jetë e pranishme. Vajza e tij, Ivanka Trump, bashkë me bashkëshortin Jared Kushner, si dhe djali i tij Donald Trump Jr., pritet të marrin pjesë në ngjarje.
Jeff Bezos, themeluesi i Amazon dhe i kompanisë hapësinore Blue Origin, vazhdon të ruajë një pozicion të fortë në listën e miliarderëve më të mëdhenj në botë. Sipas renditjes më të fundit të publikuar nga revista prestigjioze “Forbes”, pasuria e tij vlerësohet në rreth 226.7 miliardë dollarë, duke e renditur mes katër individëve më të pasur në planet. Në krye të listës qëndron Elon Musk me një pasuri prej 412.1 miliardë dollarësh, pasuar nga Bernard Arnault i LVMH dhe drejtuesi i Meta-s, Mark Zuckerberg.
Ndërkaq, firma personale e Jeff Bezos, Bezos Expeditions, po udhëheq një investim prej 72 milionë dollarësh në kompaninë e të dhënave të Inteligjencës Artificiale Toloka, e cila po kërkon të zgjerojë biznesin e saj. Toloka, e cila ndihmon në trajnimin dhe vlerësimin e modeleve të Inteligjencës Artificiale duke përdorur një rrjet ekspertësh dhe testuesish njerëzorë, është pjesë e firmës së infrastrukturës së Inteligjencës Artificiale Nebius Group dhe ka punuar me Amazon, Microsoft dhe Anthropic.
Themeluesja dhe CEO e Toloka, Olga Megorskaya, tha se investimi strategjik i udhëhequr nga Bezos ishte një moment historik që duhet të përshpejtojë rritjen e kompanisë, veçanërisht në tregun amerikan dhe të mbështesë zhvillimin e produkteve të saj përmes ekspertëve njerëzorë që bashkëpunojnë me agjentët e Inteligjencës Artificiale. “Gjithmonë do të ketë nevojë për kontroll, verifikim dhe ndihmë nga ekspertë njerëzorë për të siguruar që rezultati të jetë me të vërtetë me cilësi të lartë”-ka thënë Megorskaya për Reuters.
